Фото: Зоран Љутков
Скопјани конечно ќе ја дочекаат реконструираната Универзална сала – објект кој со децении претставува симбол на културниот живот во главниот град. Според најавите, за најмногу две години, а можно и порано, салата повторно ќе ги отвори вратите за посетителите.
Иако ќе бидат извршени сериозни интервенции, архитектонската форма и препознатливиот лик на салата ќе се задржат, со цел да се сочува колективната меморија и значењето на подарокот што Скопје го доби по катастрофалниот земјотрес во 1963 година.
Промените најмногу се однесуваат на материјалите што ќе се користат во реконструкцијата, внатрешната организација на просторот, како и на подобрувањето на акустиката и осветлувањето. Дополнително, ќе биде уреден и целиот простор околу објектот, што ќе му даде нов, современ изглед, без да се изгуби неговата автентичност.
