Фото: Facebook
Девојка од Нови Сад, Тијана Р. (19), почина од тешки повреди на градниот кош откако на 28 мај падна во море за време на парасејлинг во Будва. Нејзиното семејство предупредува дека трагедијата можела да се спречи доколку биле почитувани основните безбедносни процедури.
Адвокатот на семејството, Мирко Богичевиќ, за весникот „Побједа“ изјави дека двајца скпипери – еден од Белград и еден турски државјанин – кои управувале со глисерот за кој бил прикачен падобранот, дури по четири минути од падот сфатиле дека девојката повеќе не е на падобранот. „На снимката се слуша како во паника прашуваат: ‘Каде е девојката, каде исчезна?’ и со глисерот прават кругови барајќи ја,“ вели Богичевиќ.
Наместо веднаш да ја известат полицијата или спасувачките служби, членовите на екипажот разговарале што да ѝ кажат на мајката на Тијана. „На англиски јазик се слуша како велат: ‘Ќе и кажеме дека е жива, но тешко повредена’, иако веќе било јасно дека девојката не преживеала,“ нагласува адвокатот.
Тој потсетува дека Тијана на кобниот ден била на плажа „Могрен“ со својата стрина, на која ѝ помагала околу бебето. Неколку момчиња ѝ пријдоа и ѝ понудија бесплатен лет со парасејлинг за потребите на рекламно видео. Таа прифатила да лета, но не дала дозвола снимките да се користат во комерцијални цели.
Иако скиперите претходно ја информирале дека постои камера на падобранот која го снима летот, не постоела никаква директна комуникација помеѓу неа и екипажот. „На снимката се гледа дека првите седум-осум минути летот бил безгрижен – Тијана им мафта на блиските од брегот, ги потопува нозете во морето и се смее. Но, потоа падобранот нагло почнал да се спушта кон водата. Кога скиперите дале гас, падобранот повторно нагло се издигнал високо над морето, а во позадина се гледал целиот будвански залив. Токму тогаш таа почнува да покажува страв и гласно зборува дека ѝ е страшно,“ опишува адвокатот Богичевиќ.
Истражните органи во Црна Гора ја водат истрагата за овој случај, а семејството на Тијана бара одговорност за трагедијата која, како што тврдат, можела да биде избегната.
