Фото: Принтскрин
Трагедија го потресе црногорското приморје откако 19-годишната Тијана Р. од Нови Сад загина при несреќа со парасејлинг на 28 мај во Будва.
Според извештајот од обдукцијата извршена во Центарот за судска медицина во Подгорица, непосредна причина за смртта било удавување и гушење (асфиксија), предизвикано од тешка траума на белите дробови и внатрешно крварење.
Екипата на Итна медицинска помош од Будва пристигнала на местото околу 11 часот, но девојката веќе немала знаци на живот. Лекарите можеле само да ја констатираат нејзината смрт.
Очевидци опишале дека Тијана паднала од околу 150 метри височина во морето, по што не покажувала никакви знаци на живот. Телото веднаш било пренесено во Подгорица за обдукција и официјална потврда за причините на смртта.
Случајот дополнително ја вознемири јавноста поради снимка од камера поставена на падобранот. Како што истакна правниот застапник на семејството, адвокат Мирко Богичевиќ, на видеото се слуша разговор на двајцата скипери кои наводно се договараат како на семејството настраданата да ѝ прикажат лажна верзија дека Тијана, и покрај тешките повреди, била префрлена во болница во Котор.
Трагичниот ден започнал како обично летно уживање. Тијана била на плажата Могрен заедно со својата стрина, на која ѝ помагала околу бебето. Две лица ѝ пристапиле со понуда за промотивен лет со парасејлинг во рамки на рекламен спот на нивната компанија.
„Таа прифати да лета, но никогаш не дала согласност снимките да се користат за рекламирање,“ вели адвокатот на семејството, додавајќи дека несреќата можела да биде избегната доколку биле почитувани основните безбедносни процедури.
Семејството на Тијана бара целосно расчистување на случајот и одговорност за сите пропусти што довеле до трагичниот исход.
