Фото: ДЗС/Принтскрин
Институтот за јавно здравје (ИЈЗ) известува дека моментално нема никакви отстапувања од нормалните референтни вредности на радијацијата во воздухот во Скопје по вчерашниот пожар во Трубарево.
„По насока на Инспекторатот за животна средина, Министерството за здравство и кризниот штаб, ИЈЗ испрати обучени тимови кои земаат примероци од почва и вода од непосредната околина на засегнатото подрачје. Дополнително, се собираат мостри од чешми, бунари и почва за испитување на евентуално јонизирачко зрачење. Резултатите од анализите ќе бидат објавени веднаш по нивното обработување“, соопшти ИЈЗ.
Во периодот од 7 до 14 септември, автоматските мерни станици на Институтот работеа непрекинато, следејќи го радијацискиот фон на сите 14 локации низ Македонија, вклучувајќи ја и станицата во Скопје (MKMP-1).
Резултати за Скопје (MKMP-1):
- Просечна вредност: 51 нано сиверт/час
- Најниска/највисока вредност: 51–69 нано сиверти/час
- Вредност измерена на 14 септември 2025, 11:30 ч.: 50 нано сиверти/час
Сите овие бројки се во рамки на природниот радијациски фон и не покажуваат никакво зголемување кое би претставувало ризик по здравјето на граѓаните.
Институтот поседува современа акредитирана лабораторија и високо квалификуван кадар за мониторинг на јонизирачко зрачење. ИЈЗ најавува дека и натаму ќе ја следи состојбата во соработка со Министерството за здравство и другите надлежни институции и ги повикува граѓаните да ги следат официјалните препораки за заштита на здравјето.
Претходно денеска, Основното јавно обвинителство Скопје информираше дека се преземаат дејствија за утврдување на факти и обезбедување докази за пожарот. Единицата за атомска, биолошка и хемиска одбрана на Армијата изврши мерења за евентуална хемиска и токсична контаминација на воздухот, а резултатите од нив ќе бидат доставени до обвинителството. ОЈО Скопје продолжува да собира документација за работата на компанијата каде избувнал пожарот.
