Првиот заменик на претседателот на Владата и министер за животна средина и просторно планирање, Изет Меџити, денеска ја посети локацијата на складиштето во Трубарево, кое претходно беше зафатено од пожар. На терен е поставена нова мерна станица која ќе го следи квалитетот на воздухот 24 часа дневно.
Министерот Меџити беше придружуван од директорката на Државниот инспекторат за животна средина, Ивана Гиновска, како и од ректорот на Универзитетот „Гоце Делчев“ од Штип, проф. д-р Дејан Мирковски.
За време на посетата беше направен увид во работата на мерната станица, која овозможува следење на амбиенталниот воздух во реално време. Целта на оваа иницијатива е да се потенцира значењето на постојаното мониторирање на квалитетот на воздухот и унапредување на животната средина преку соработка меѓу различни институции.
Мерните станици ќе вршат континуирани 24/7 мерења, а јавноста ќе има можност да ги следи податоците во реално време и да биде навремено информирана за состојбата на воздухот.
