Фото: Принтскрин
Во чест на Денот на српското единство, слободата и националното знаме, на 20 септември пред Палатата Србија во Нов Белград ќе се одржи голема воена парада под мотото „Силата на единството“.
Овој државен празник се одбележува на 15 септември во Србија и во Република Српска, а беше воспоставен во 2020 година. Датумот е симболично избран – токму на тој ден во 1918 година беше пробиен Солунскиот фронт, настан што го забрза поразот на Централните сили во Првата светска војна.
Во пресрет на парадата, на белградските улици веќе се распоредени голем број воени возила на Армијата на Србија. Меѓу нив се забележува и кинескиот ракетен систем земја-воздух HQ-22, дел од вооружувањето на 250. ракетна бригада за противвоздушна одбрана, кој служи за надзор и дејствување на големи далечини.
Граѓаните можеа да видат и оклопни транспортери БОВ OT M-21, кои се користат во пешадиските баталјони на Копнената војска и во Воената полиција, како и теренски возила опремени со дронови и ракети.
Посебно внимание привлече и системот PASARS-16, оружје за краткодометна противвоздушна одбрана кое комбинира противвоздушен топ Бофорс од 40 милиметри со различни типови ракети – од францускиот Mistral 3, до Стрела-2М и Игла. Овој систем е веќе распоредуван во баталјоните за противвоздушна одбрана во рамки на армиските бригади.
