Фото: ФФМ
Македонската фудбалска репрезентација вечерва од 18 часот на Националната арена „Тодор Проески“ ќе му излезе на мегдан на Лихтенштајн во натпревар од квалификациите за Светското првенство.
По прекинот на долгата серија без пораз со неуспехот против Саудиска Арабија, „црвено-жолтите“ се враќаат пред домашната публика со јасна цел – триумф што ќе ја врати селекцијата на врвот од групата.
Репрезентацијата влегува комплетна во дуелот, без проблеми со повреди, а играчите се подготвени да дадат максимум за победа. Се очекува дека првиот гол ќе биде клучен за отворање на играта и рушење на отпорот на Лихтенштајн.
Овој натпревар ќе биде 13-ти во историјата меѓу двете селекции. Македонија досега има забележано 11 победи и едно реми, со импресивна гол-разлика од 45:5. Токму против Лихтенштајн беше запишана и најубедливата победа во нашата фудбалска историја – 11:1 на 9 ноември 1996 година во Ешан.
