Василија ги освои срцата на фановите: Родена сум во Ќустендил, но срцето ме тера кон Македонија

Младата фолк-пејачка од Бугарија, Василија Петрова, за кратко време успеа да се наметне како едно од најомилените имиња на музичката сцена во Македонија. Со својата харизма и енергични настапи таа постојано ги освојува публиките на бројни манифестации и концерти низ целата држава.

Нејзината популарност не застанува само во Македонија – видеата од нејзините гостувања кај македонската дијаспора често привлекуваат големо внимание на социјалните мрежи, каде што фановите ја поздравуваат со безброј позитивни коментари.

Василија не крие дека ја врзуваат силни емоции за нашата земја. Иако е родена во Ќустендил, таа често истакнува дека „срцето ја носи кон Македонија“. Во неодамнешно интервју за магазинот Гламур, младата пејачка ја истакна својата духовна и културна поврзаност со корените.

„Мојата врска со Македонија е искрена и длабока. Коренот си е корен, а кочанскиот е навистина силен. Иако сум родена во Бугарија, чувството што го имам кон Македонија ми дава сила и инспирација. Со секоја песна се трудам да ја пренесам душата и љубовта што ја чувствувам кон оваа земја. Музиката зборува повеќе од зборови“, вели Василија за „Гламур“.