Фото: Принтскрин
Обвинетиот за трговија со дрога, Раде Трајковски – познат како Штекли, според едно од вештачењата на обвинителството, е способен да го следи судскиот процес и да учествува во својата одбрана. На денешното рочиште, психијатарот сведочеше дека Трајковски не покажува психотични симптоми, ниту за време на неговиот престој во скопскиот затвор бил дијагностициран со психоза.
Во изјавата на вештакот се наведува дека Трајковски раскажувал за претходен живот, во кој „бил желка“ и дека верува во реинкарнација, што е причината зошто избегнува да јаде месо. Овие искуства, според обвинителството, не претставуваат доказ за психотично нарушување. Во јуни бил прегледан и од друг специјалист, кој исто така не констатирал психоза.
Спротивно на ова, психијатарот на одбраната – Ѓорѓија Хаџи Ангелковски – смета дека кај Трајковски постојат шизофрени елементи, дека верувањето во реинкарнација и „имагинарниот учител“ кој му диктира како да се однесува, се јасни показатели дека тој не може рационално да ја следи постапката.
Судијата Илија Трпков најави дека ќе организира соочување на вештаците пред да донесе конечна одлука – дали ќе се прифати едното вештачење или ќе се побара ново. Продолжението на процесот е закажано за октомври, кога ќе сведочи и вториот вештак на обвинителството.
Од групата на Трајковски, четворица обвинети веќе ја признале вината, а претходно и седуммина други се спогодија со обвинителството и добија затворски казни меѓу 3 и 5 години.
