Фото: Принтскрин
Во австралискиот град Сиднеј се случи необичен и загрижувачки инцидент, кога постар маж кој дошол да го земе својот внук од градинка, по грешка однел друго дете дома. Настанот веднаш предизвика истрага во институцијата, а еден од воспитувачите бил суспендиран од работа.
Според извештаите, дедото не забележал дека наместо внукот, земал друго едногодишно момче кое во тој момент спиело. Воспитувачите ја откриле грешката дури кога мајката на детето пристигнала во градинката и со шок дознала дека нејзиниот син не е таму.
„Не можам да опишам како се почувствував во тој момент. Немаме лутина кон човекот што ја направил грешката, но ја обвинуваме градинката за немарност,“ изјавила мајката за „Гардијан“.
Случајот предизвика реакции и кај надлежните институции. Австралиската регулаторна агенција за образование и грижа за деца потврди дека е во тек „детална истрага за сериозен и длабоко вознемирувачки инцидент“ и најави дека ќе бидат преземени соодветни мерки за да не се повтори ваква ситуација.
