Фото: Принтскрин
Претседателот на Србија, Александар Вучиќ, за време на својата посета на Пекинг, изрази восхит од технолошкиот и воениот напредок на Кина, нагласувајќи ја нејзината растечка глобална моќ. Како што пренесуваат српските медиуми, тој најави и повеќе значајни настани и проекти поврзани со Србија, вклучително и воената парада што ќе се одржи во Белград на 20 септември.
Во своето обраќање, Вучиќ посочи дека на воената парада во Кина биле прикажани системи кои, како што рече, претставуваат „стратешка предност во однос на другите држави“. Особено внимание привлече презентацијата на ракетниот систем DH-5, кој, според него, се состои од интерконтинентални проектили способни да погодат која било точка на планетата.
„Кина е сè понапредна – веќе се натпреварува со САД за водечка позиција во светот. Она што го покажаа е само дел од нивниот потенцијал“, изјави Вучиќ, додавајќи дека западните медиуми со голем интерес го следеле настанот.
Претседателот исто така откри дека во Пекинг се сретнал со претставници на 11 кинески компании и најави еден футуристички проект за Србија – тестирање на летачки автомобили. „Следната година започнуваме со тестирања на летачки автомобили во Србија“, изјави тој, не откривајќи повеќе детали за технологијата или потенцијалните партнери.
