Фото: Принтскрин
Поранешниот премиер Никола Груевски повторно се огласи преку својот профил на Фејсбук, овојпат со подолг текст во кој се осврнува на темата за архитектурата. Во обраќањето тој се повикува на неодамнешните одлуки на американскиот претседател Доналд Трамп, кој се залага за враќање на класичниот стил во архитектонските решенија во САД.
Груевски ја искористи оваа паралела за да се наврати на времето кога беше премиер на Македонија, потсетувајќи на проектите и објектите кои тогаш беа изградени во Скопје. Според него, тие градби оставиле силен белег врз изгледот на главниот град и претставувале симбол на нова урбана естетика.
„Американскиот претседател Доналд Трамп уште во првите денови по инагурацијата во јануари 2025 година издаде извршна наредба за враќање на класичната архитектура. Всушност тоа беше и едно од неговите ветувања во кампањата пред изборите.
Пред два дена, на 28 август 2025 година, извршната наредба е објавена овој пат во подолга и многу поконкретна форма, очигледно подолго внимателно подготвувана од експерти од неговиот тим, која во целост може да се најде на веб страната на Белата куќа, а ја пренесоа и мал број од македонските медиуми“, вели меѓу другото Груевски. Целиот статус во продолжение.
