Фото: Принтскрин
Американската амбасадорка во Македонија, Анџела Агелер, во интервју за утринската програма „Македонија наутро“ на МРТВ, сподели дел од своето секојдневие, како и личните впечатоци од животот и работата во земјава.
Агелер објасни дека нејзиниот ден започнува во раните утрински часови со прошетка на своето милениче, по што следуваат физички активности и преглед на најновите вести и електронската пошта. Според неа, ваквата рутина ѝ овозможува да биде подготвена за динамичниот распоред што ја очекува.
Амбасадорката истакна дека вообичаено пристигнува во Амбасадата помеѓу 8:30 и 9:00 часот, каде ја продолжува својата дипломатска агенда, исполнета со состаноци, средби и активности насочени кон унапредување на соработката меѓу Македонија и САД.
„Се заљубив во оваа земја, во луѓето, културното наследство, традициите, храната и виното. Чест и привилегија е да се биде амбасадор на САД токму овде. Ова е земја што ја сакам и ја ценам. Тука има многу потенцијал, особено кај младите, и би сакала да го видам тој потенцијал остварен“, вели Агелер.
