Успението на Пресвета Богородица е еден од најголемите празници што верниците го одбележуваат со голема љубов и почит. Покрај црковните обреди, со овој ден се поврзани и бројни народни верувања и традиции, кои се пренесуваат од генерација на генерација.
Според преданијата, токму на овој празник билките што ќе се соберат имаат особена моќ. Жените традиционално береле лековити тревки и плодови со верување дека тие ќе донесат здравје и благосостојба во домот.
Особено место има босилекот – сметан за света билка што го штити семејството од секакво зло. Во некои краеви, на Успение се ставал во јадењата или се чувал во домот како благослов и заштита.
Се верувало и дека оние што ќе се измијат во природни извори на овој ден, ќе добијат исцеление со помош на Пресвета Богородица.
Народот овој период меѓу Големата и Малата Богородица (21 септември) го нарекувал „Меѓудневница“. Тогаш се собирале разни билки – ајдучка трева, пиперка, рицинус, коњски босилек и други, за кои се мислело дека лекуваат женски болести и носат плодност.
Жените, во знак на почит кон празникот, избегнувале работа со раце, особено шиење и везење. Постои и верување дека гребнатинка од боја на икона на Богородица, растворена во вода, можела да помогне кај различни тегоби кај жените.
Овие обичаи и денес се прераскажуваат како дел од богатото народно наследство, потсетувајќи дека празникот не е само духовен, туку и длабоко поврзан со животот и здравјето на луѓето.
