(Видео) Рама прави „парче“ – руши сè што е дивоградба во Албанија

Албанскиот премиер Еди Рама започна широка акција против дивоградбите во земјата, најавувајќи дека нема да има толеранција за нелегално изградени објекти, без разлика кој стои зад нив.

Во последните денови, во Валона и Драч беа урнати повеќе дивоградби – дел со употреба на динамит, а дел со тешка механизација. Денеска, акцијата продолжи на ’ртот Родонит во општина Драч, каде што беа срушени објекти изградени во заштитено подрачје кое претставува природно богатство и е од особено значење за граѓаните и туристите.

Од кабинетот на премиерот појаснуваат дека борбата против урбанистичкиот хаос ќе биде долгорочна и системска. Освен отстранување на нелегалните градби, ќе следува и зајакнување на законската рамка за да се обезбеди дека сторителите ќе сносат одговорност. Притоа, мерките нема да се однесуваат само на оние кои незаконски граделе, туку и на сите кои со години им овозможувале заштита преку коруптивни врски – вработени во инспекторати, полициски структури или локални власти.