Фото: Принтскрин
Рускиот министер за надворешни работи, Сергеј Лавров, во неделата ги изнесе клучните руски услови за постигнување мир во Украина, предлагајќи безбедноста на земјата да ја гарантира група држави во која би влегле и постојаните членки на Советот за безбедност на ОН, пренесува „Ројтерс“.
Во интервју за американската телевизија NBC News, Лавров откри дека за прашањето на безбедносните гаранции разговарале рускиот претседател Владимир Путин и тогашниот американски претседател Доналд Трамп, при што Путин потсетил на пропаднатите преговори што се одржаа во Истанбул во 2022 година.
На тие преговори, според нацрт-договорот во кој „Ројтерс“ имал увид, било дискутирано за трајна неутралност на Украина во замена за безбедносни гаранции од петте постојани членки на Советот за безбедност на ОН – Велика Британија, Кина, Франција, Русија и САД, со учество и на други држави. Лавров сега прецизира дека, покрај членките на Советот за безбедност, во таа група гаранти би можеле да бидат и Германија и Турција.
Според Лавров, моделот е јасен. „Гарантите би гарантирале безбедност за Украина, која мора да биде неутрална, која не смее да припаѓа на ниту еден воен блок и која мора да биде ненуклеарна“, изјави тој, според транскриптот што го објави руското министерство за надворешни работи.
Со тоа уште еднаш потенцира дека членството на Украина во НАТО е неприфатливо за Русија. Дополнително, тој истакна дека Москва и понатаму бара заштита за говорителите на рускиот јазик во Украина, како и потреба за водење територијални разговори.
Овие услови се во согласност со претходните извештаи, според кои Путин бара Украина да ја предаде целата источна област Донбас, да се откаже од амбициите за НАТО, да остане неутрална и да не дозволи присуство на западни трупи на своја територија.
