Фото: Принтскрин
На натпреварот што денеска се одигра на игралиштето „Бело Брдо“ во Штип, се случи тежок инцидент кој го наруши спортскиот дух и предизвика голема вознемиреност. Млади фудбалери на Брегалница беа физички нападнати од родител на играч од скопски Шкупи, а случајот веќе е потврден и од Министерството за внатрешни работи.
Според официјалното соопштение на МВР, 43-годишен маж од Скопје, родител на млад фудбалер на Шкупи, влегол на теренот за време на натпреварот и физички нападнал двајца малолетни играчи на домашниот тим. Нападнатите деца веднаш биле префрлени во штипската болница, каде што им е укажана лекарска помош.
„Денеска (24.08.2025) во СВР Штип било пријавено дека на игралиштето „Бело Брдо“ во Штип, за време на одигрување на фудбалски натпревар помеѓу младинските екипи на ФК „Брегалница“ од Штип и ФК „Шкупи“ од Скопје, А.А.(43) од Скопје, родител на фудбалер од ФК „Шкупи“, физички нападнал двајца малолетници од Штип, фудбалери на ФК „Брегалница“, и им нанел повреди. Веднаш по нападот, полициски службеници од СВР Штип го лишиле од слобода А.А., а малолетниците биле пренесени во Клиничка болница Штип за укажување помош. Известен е јавен обвинител и се преземаат мерки за целосно расчистување на настанот, по што ќе бидат поднесени соодветни пријави“, соопшти МВР.
