Фото: ChatGPT
Неодамна се појави информација која ја објавија руски хакери. Според нивните тврдења, засновани – како што велат – на хакирање на базата на податоци на украинската армија, Украина изгубила 1,7 милиони војници. Бидејќи хакерите излегоа со многу штури информации и не дадоа дополнителни објаснувања за тие податоци, многу аналитичари се сомневаат во нивната веродостојност. Од друга страна, ваквите процени се многу тешки за утврдување, па затоа сите аналитички центри или независни аналитичари ги засноваат анализите на приближни пресметки.
Украински загуби
Според проценките на експерти кои се занимаваат со загубите, убиени се меѓу 160 и 200 илјади украински војници. Како основа за овие процени служи страницата UA losses (линк 1), на која се идентификувани речиси 160.000 убиени, исчезнати и заробени. Со груба апроксимација, базирана на односот 4 спрема 1 (ранети, исчезнати и заробени наспроти убиени), може да се дојде до бројка од 800.000 до 1.000.000 луѓе кои се целосно исфрлени од строј (убиени, ранети, заробени, исчезнати итн.).
Оваа бројка ги вклучува загубите во сите гранки на украинската армија, полицијата, граничната служба, националната гарда, службата за безбедност (СБУ) и странските платеници. Главниот недостаток на оваа процена е тоа што се темели исклучиво или речиси исклучиво на некролози и јавно достапни информации. На пример, не се земени предвид податоци од гробишта и други извори што не се достапни за јавноста.
Руски загуби
За процена на руските загуби постои порталот Mediazona (линк 2), кој по име изброил повеќе од 120.000 загинати, а бидејќи списокот е исто така непотполен, проценката на порталот оди до 165.000 загинати. Овие загуби ја вклучуваат руската армија, националната гарда, персоналот на ФСБ, како и платениците на „Вагнер“ и регрутираните затвореници. Во бројките се вклучени и силите на ЛНР и ДНР, но само од моментот на формалната руска анексија. Она што не е вклучено се загубите на ЛНР/ДНР во првите месеци од војната.
Со користење на груба апроксимација врз основа на загубите на ЛНР/ДНР откако формално станаа дел од руската армија, се доаѓа до бројка од околу 5–6 илјади убиени припадници на донбаските сепаратистички сили во првите месеци од војната. Така вкупниот број достигнува околу 170.000 загинати во руската армија. Треба да се напомене дека во оваа бројка не се вклучени загубите на севернокорејските сили во Курската област.
Применувајќи го истиот метод на процена на вкупните загуби како кај украинската армија (сооднос 4 спрема 1), се доаѓа до бројка од приближно 800 до 900 илјади вкупни загуби. Тоа значи дека грубо земено, и руската и украинската страна имаат донекаде слични загуби.
Мобилизација
Гледајќи го текот на мобилизацијата: Русија и Украина за време на војната регрутирале, односно мобилизирале меѓу 30 и 40 илјади луѓе месечно. Русија во последно време го зголеми тој број и до 60 илјади месечно. Со груба апроксимација, тоа изнесува меѓу 1,2 и 1,6 милиони мобилизирани луѓе во период од 3,5 години.
Иако и двете армии бележат раст во бројот на персонал, регрутирањето и мобилизацијата главно се користат за пополнување на постојните единици.
