Фото: Принтскрин
Александар Кикановиќ, ултрамаратонец и хуманитарец од Лозница, завчера ја премина границата меѓу Македонија и Грција, а утрово, по еден ден одмор, го продолжи хуманитарниот маратон од Лозница до Манастирот Хиландар. Според неговите зборови, пред него има уште 160 километри, односно четири дена трчање до местото Уранополис, од каде што со брод ќе се префрли на Света Гора, односно во Хиландар.
– Сè оди според планот, добро сум, иако е напорно. Знаев што ме чека и зошто го правам ова, а мотивот е голем како планина. Со благословот на Хиландар мора да се успее. Планот е во четврток да бидам на целта – изјави Кикановиќ пред продолжението на трчањето и додаде дека од поаѓањето, на 2 август, досега изгубил повеќе од пет килограми.
Да потсетиме, овој пат Кикановиќ трча за собирање средства за бесплатни детски кампови, како и за дополнителни потреби во Хиландарското село во Сијаринска Бања, кое го сочинуваат обновени објекти за колективно и индивидуално сместување, наменети пред сè за летни кампови за деца. Со селото управува Добротворно-образовното здружение на Светиот манастир Хиландар „Теофил 1198“, а кампот започна во јули.
Тој секојдневно минува делници од по 40 километри, речиси цел маратон, а планот е тоа да трае вкупно 23 дена, плус деновите за одмор. Овој пат ќе помине вкупно 918 километри и ќе оствари уште еден несекојдневен подвиг.
