Фото: Принтскрин
Премиерот и лидер на ВМРО-ДПМНЕ, Христијан Мицкоски, на отворањето на „политичкиот саем“ каде што градоначалниците од неговата партија ги презентираат резултатите од својата работа, остро ја критикуваше претходната влада, обвинувајќи ја за негрижа и недостиг на слух за потребите на локалните заедници.
„Општините беа оставени сами на себе, без никаква помош од централната власт. Се справуваа со пожари, поплави, непогоди, па дури и со блокирани сметки – и тоа со сопствени сили и ресурси. Добро ги паметам часовите минати во состаноци и телефонски разговори во мојот кабинет за да се најдат решенија и да се премостат тие предизвици“, нагласи Мицкоски.
Тој истакна дека во изминатите четири години, градоначалниците од редовите на ВМРО-ДПМНЕ ја оправдале довербата што им ја дале граѓаните и, како што рече, „задржале интегритет и не се вплеткале во афери или коруптивни скандали кои би ја нарушиле честа на партијата и граѓаните“.
