Животот е сè поскап во Македонија: За да преживее семејство му требаат 65.507 денари

Вредноста на синдикалната минимална кошница за месец август 2025 година достигна 65.507 денари, што претставува пораст од 179 денари во однос на јули, кога изнесуваше 65.328 денари. Според Сојузот на синдикатите на Македонија (ССМ), ако се направи споредба со периодот пред укинување на владините антикризни мерки, вкупната сума е зголемена за 2.816 денари, односно за 4,49 проценти.

Од ССМ дополнуваат дека доколку четиричлено семејство живее во изнајмен стан од 60 квадратни метри, месечните трошоци во август достигнуваат вкупно 80.882 денари.

Најголем товар во буџетот и понатаму претставуваат храната и пијалоците, чија вредност за август се искачи на 24.064 денари. Ова е зголемување од 382 денари во споредба со јули, а во однос на периодот по укинувањето на мерките, растот изнесува 2.584 денари, што е за 12,09 проценти повеќе.

Кај останатите категории се забележани мали намалувања: за облека и обувки трошоците се пониски за 114 денари, кај личната хигиена има пад од 74 денари, а кај транспортот намалување од 16 денари.