Фото: Принтскрин
Нападите од мечки станаа секојдневна грижа за жителите на северна Црна Гора. Додека досега главна жртва на овие диви животни беше добитокот, најновиот инцидент покажува дека опасноста веќе директно ги засега и луѓето.
Утринава, на патот кон Горна Морача, двајца мештани доживеале непријатна средба лице в лице со мечка. Еден од нив, Вељко Ранковиќ, за порталот РТЦГ сведочи дека со својот пријател Никола Мештер се враќале од планината кон селото, кога одеднаш возилото било нападнато. Според него, мечката од ненадејно растојание од околу педесет метри фрлила камен кон автомобилот, при што Ранковиќ бил погоден во рамото и повреден.
„Тргнавме од планината околу десет часот. Никола управуваше со автомобилот, јас бев совозач. Во еден момент само слушнавме тресок, а потоа почувствував силна болка во рамото. Дури тогаш сфативме дека сме нападнати. Го повикавме ловџискиот чувар и полицијата, кои веднаш излегоа на терен“, изјави Ранковиќ.
Инцидентот го потврди и ловџискиот чувар Милинко Луковац, кој прв пристигнал на местото на настанот. Тој објасни дека силата на ударот била толкава што два прозорци на автомобилот биле скршени, а само со среќа немало потешки последици. „Каменот прво ги скрши стаклата, потоа удри во совозачот и заврши кај менувачот. Се работи за голема опасност, бидејќи во спротивно можеше да заврши фатално“, истакна Луковац.
Жителите на овој регион веќе со месеци алармираат дека мечките сè почесто се приближуваат до куќите, уништуваат имоти и напаѓаат добиток. Новиот напад, меѓутоа, покажува дека ситуацијата станува уште поалармантна – сега дивите животни претставуваат и реална закана за безбедноста на луѓето.
Фото: Принтскрин
