Вечерва во 20 часот, одбојкарската репрезентација на Македонија ќе го пречека тимот на Грузија во СЦ „Борис Трајковски“ во натпревар кој ќе одлучи за пласман на Евроволеј 2026. Успешниот исход би значел четврто последователно учество на нашата национална селекција на Европското првенство.
По поразот од 3-0 во Атина од Грција, Македонија нема право на грешка. Селекцијата мора да забележи сигурна победа од 3-0 и да минимизира изгубени поени за да остане конкурентна за едно од местата меѓу петте најдобро пласирани екипи, кои, заедно со седумте првопласирани од квалификациските групи, обезбедуваат учество на ЕвроВолеј 2026.
Во претходниот дуел со Грузија, македонските одбојкари ги совладаа гостите со истиот максимален резултат, но вечерва ќе биде неопходна целосна концентрација за повторување на успехот на домашен терен.
Селекторот Јошко Миленкоски ги повика сите навивачи да дојдат и да ја дадат својата поддршка:
„Натпреварот со Грција го оставаме зад нас. Игравме против силен тим, но сега целосно сме фокусирани на Грузија. Очекуваме полна сала и поддршка од љубителите на одбојката за да стигнеме до победа и уште едно учество на Европското првенство“, истакна Миленкоски.
