Во светиот манастир Дохијар на Света Гора, почетокот на овој месец се случи настан кој верниците го нарекуваат вистинско Божјо чудо.
Според сведоштво на монах од манастирот, кој подоцна раскажал за настанот и во Солун, 18-годишно момче од Струмица, кое од раѓање немало изговорено збор, првпат проговорило токму пред чудотворната икона на Богородица – Горгоепикоос, позната меѓу православните како Брзопослушница.
Момчето дошло во манастирот во придружба на роднина од Солун. Штом застанале пред иконата, од неговата уста се слушнале зборови на македонски јазик:
„Мајко Пресвета, дарувај ми здравје!“
Сите присутни биле во неверување, а по завршувањето на молитвата момчето повторно се обратило:
„Ви благодарам, сега се чувствувам многу подобро.“
Во манастирот Дохијар секојдневно се чита молебен кон Богородица, при што се изговараат имиња на многу верници, живи и упокоени, со вера дека нивните молитви ќе бидат услишани.
Настанот уште еднаш ја потврдува силата на застапништвото на Мајката Божја и чудотворната моќ на иконата Горгоепикоос, која со векови претставува надеж и утеха за верните.
Случајот го потврдија и свештеници од Струмица, за кои ова чудо е голема радост за православната заедница.
