Пратеникот и портпарол на Левица, Амар Мециновиќ, преку објава на својот фејсбук профил ја нагласи важноста на Старата скопска чаршија и потребата таа да биде подобро промовирана и претставена пред туристите.
Тој сподели дека првото утринско кафе го испил токму таму, притоа споредувајќи ја скопската чаршија со онаа во Сараево.
„Еден уметнички историчар од Сараево, при посета на Скопје, рече дека речиси сите обележја кои ги има нивната чаршија, во нашата се присутни во многу поголеми размери – анови, амами, тесни улички. Скопската чаршија е навистина огромна и интересна, но за разлика од сараевската, многу помалку туристи привлекува. Причината е што таму централната и локалната власт вложуваат во приказната која е привлечна за секој посетител“, напиша Мециновиќ.
Тој додава дека Македонија може да ја „продаде приказната“ за својата чаршија на сличен начин и да привлече многу повеќе гости, бидејќи – како што вели – едно од првите прашања на странските посетители секогаш е „каде е вашиот стар град?“.
Во продолжение, Мециновиќ спомена и интересен разговор со странски дипломати за македонската култура на кафе. „Кај нас се пие кафе во огромни количини, што е и разбирливо за една балканска земја која од една страна ја наследила турската, а од друга страна италијанската традиција на кафе“, истакна тој.
