По пет дена од реакцијата на граѓаните за алармантното опаѓање на водостојот во Дојранското Езеро, од Министерството за животна средина информираа дека се пуштени три пумпи од „Системот за спас на Дојранското Езеро“ кај Ѓавото. Водата веќе пристигна во сливниот канал и со силен тек се движи кон езерото, што предизвика радост кај жителите.
Но, истовремено, запуштениот изглед на просторот околу каналот во месноста Топлец ги натера локалците сами да се организираат и да се зафатат со уредување. Прв на терен се појави Бранко Караколев од Нов Дојран со трим косилка, кој веќе пет дена ја коси сувата трева и го расчистува теренот. Заедно со својот пријател Самир Патрон потрошиле 16 литри гориво, а апелираат за донација од уште барем 10 литри и масло за косилката за да ја довршат работата.
„Овде израснавме. Треба да се чува езерото, системот и просторот околу него. Не чекавме други, сами почнавме,“ вели Караколев.
Водата стигна до Топлец, но и Топлец треба да заличи – и со полниот канал, и со уредениот парк изграден во чест на проектот „За спас на Дојранското Езеро“.
Бранко не е непознат за дојранчани. Минатата година, за време на големата бура, неговиот чамец беше одвлечен во длабоките води на езерото, а силните бранови го исфрлија на грчкиот брег. Тој преживеа откако успеа да го преплива езерото во борба со ветерот, студот и ноќта.
Денес, со својата посветеност кон уредувањето на просторот, тој повторно ја покажува својата благодарност кон езерото кое тогаш му го спаси животот.
