Црногорската полиција распиша потерница по 18-годишниот државјанин на Македонија, Андреј Танасковски, осомничен за обид за убиство на Марко Љубиша – Кан (56) од Будва, висок член на криминален клан. Настанот се случил на 7 август во хотелскиот комплекс „Маестрал“ во Пржно, кога осомничениот испукал два куршуми кон жртвата, ранувајќи го во главата, а потоа побегнал.
Според истрагата, Танасковски престојувал во хотелот со фалсификувана српска лична карта. Освен за обид за убиство, против него се поднесени пријави и за недозволено поседување оружје и фалсификување исправи.
Полицијата апелира до граѓаните да пријават доколку имаат информации за неговото движење или престој, предупредувајќи дека секое прикривање може да се третира како кривично дело. Македонската полиција ја потврдила неговата идентификација за помалку од 24 часа, во координација со црногорските власти.
