Раст од 20% на странски туристи во првото полугодие

Во првите шест месеци од годинава бројот на туристи во Македонија е зголемен за околу 13,5% во однос на истиот период лани, а кај странските посетители растот изнесува речиси 20%, изјави премиерот Христијан Мицкоски по презентацијата на новите лесни оклопни возила JLTV во штипската касарна „Јане Сандански“.

Тој нагласи дека ваквите резултати се должат на организиран пристап и посветеност во развојот на туризмот, додавајќи дека и по завршување на летната сезона се очекуваат 40 до 60 илјади гости кои ќе остварат од 150 до 300 илјади преноќувања – бројки што, според него, досега не се забележани.

Во однос на состојбата со Охрид и препораките на УНЕСКО, премиерот рече дека Владата веќе формирала тим кој ќе работи на отстранување на забелешките, со цел заштита на Охридското Езеро и културното наследство.