Утрово во Скопје, на 89-годишна возраст, почина оперската првенка и професорка Милка Ефтимова. Родена во Радовиш во 1936 година, таа остави длабока трага на македонската музичка сцена, позната по моќниот мецосопран и богат репертоар.
Внука на револуционерот Петруш Поплазаров, Ефтимова првите големи настапи ги имала уште во раните 60-ти, меѓу кои и под диригентската палка на Ловро фон Матачиќ во Виена. Од 1961 станува солист на Македонската опера, а нејзината прва улога била Ацучена во „Трубадур“. Во текот на кариерата блескала во „Кавалерија Рустикана“, „Мадам Бетерфлај“, „Орфеј и Евридика“, но и во нејзиниот заштитен знак – „Кармен“.
Освојува награди на меѓународни конкурси, настапува во Европа, Русија и Кина, а неколку години била првенка на Љубљанската опера. На 6 ноември 1991 година, по 157 изведби, се простува од сцената токму со „Кармен“.
Во Скопје се враќа во 1978 година, каде продолжува со нови улоги и педагошка работа, оставајќи зад себе генерации ученици и трајно место во историјата на македонската опера.
