Тела на Македонец и двајца Срби пронајдени во црни вреќи – биле мачени, па ликвидирани!?

Во вооружен конфликт меѓу нарко-картели во Јужна Америка, животите ги загубија двајца државјани на Србија и еден Македонец. Според информации од локалните медиуми, нивните тела биле пронајдени завиткани во црни најлонски кеси, со траги кои упатуваат на тоа дека пред смртта биле брутално мачени. Настанот, според првичните податоци, се случил во Боливија, објави „Новости.рс“.

Властите потврдија дека телата се испратени на обдукција со цел да се утврди точната причина за смртта, а официјална идентификација сè уште нема. Истрагата укажува на тоа дека станува збор за сурова ликвидација поврзана со пресметка меѓу меѓународни криминални групи кои се занимавале со трговија на кокаин.

Меѓу жртвите е и Миљан Ѓ., познат под прекарот „Хитри“ од Ниш, за кого се верува дека бил лидер на криминална мрежа која организирала транспорт и дистрибуција на големи количества кокаин од Јужна Америка кон западноевропски земји. Тој бил ликвидиран пред два дена во, како што се претпоставува, територијата на Боливија, за време на вооружен судир меѓу конкурентски групи.

Втората жртва е Дејанчо Л., државјанин на Македонија, а третиот убиен е исто така роден во Ниш, кој во моментот на патувањето низ Јужна Америка користел фалсификувани лични документи. Според неофицијални извори, мотивот за крвавиот инцидент е борбата за контрола врз каналите за дистрибуција на дрога во регионот, пишува „Новости.рс“.

Извор: Новости.рс