Српскиот криминалец „Чикаго“ претепан од три лица – се бори за живот

Во ноќните часови во саботата, во еден од клубовите во Алексинац, 47-годишниот Дарко Јанковиќ, во подземните кругови познат под прекарот Чикаго, претрпе тешки повреди по брутален физички напад. Инцидентот се одиграл пред присутни гости, кои сведочеле како три лица го напаѓаат и силно го удираат по главата, лицето и градниот кош.

По нападот, Јанковиќ бил итно пренесен во Клиничкиот центар во Ниш, каде што медицинските тимови се борат да му го спасат животот. Според информациите на српските медиуми, полицијата привела тројца осомничени, кои наводно се поврзуваат со локалната криминална група „Јојке“ од Алексинац. Оваа група неодамна беше приведена под сомнение за тројно убиство, но поради недостиг на докази членовите беа пуштени на слобода. Причините за синоќешниот напад засега остануваат непознати, а истрагата е во тек.

Дарко Јанковиќ има долга криминална биографија и пред само една година излезе од затвор, каде што ја издржуваше казната за убиство сторено во 2014 година. Тогаш, во физичка пресметка пред едно кафуле во Ниш, тој смртно го повредил Саша Дудиќ, кој претходно го нападнал и му нанел убодна рана со нож.