Фото: Принтскрин
Премиерот Христијан Мицкоски денеска изјави дека неговата цел е минималната плата во земјата да достигне 1.000 евра, за разлика од сегашните околу 500, но подвлече дека ова прашање мора да се разгледува и решава во рамки на Економско-социјалниот совет (ЕСС).
Тој ги повика, како што рече, „вистинските синдикалци“ да се оградат од политички пораки и да се насочат кон борба за конкретни работнички права, обвинувајќи дека дел од опозициските политичари ги користат синдикалните организации за свои цели.
Во изјава за медиумите во Петровец, Мицкоски нагласи дека без заеднички договор меѓу синдикатите и работодавачите не е можно да се донесе нов закон, особено во период пред избори. Според него, најголем придонес кон инфлацијата доаѓа од секторот на услугите, но истовремено просечната плата бележи раст од 11% во услови на инфлација од 4,5%, што, како што истакна, значи реално зголемување на нето-приманјата.
Премиерот потсети дека Владата, како најголем работодавач, постигнала договор за покачување на платите во повеќе сектори – образованието, здравството, МВР, Министерството за одбрана и останатите државни институции – со што, според него, веќе нема вработени кои примаат минимална плата. За приватниот сектор, Мицкоски истакна дека одговорноста за покачување на платите лежи кај самите синдикати и работодавачите.
