Фото: Принтскрин
Министерката за образование и наука, Весна Јаневска, изрази надеж дека наскоро ќе биде одобрен проект кој ќе овозможи финансиска поддршка за набавка на нова опрема за Сеизмолошката опсерваторија. Целта е да се обезбедат неопходни инструменти и со тоа да се спречи затворањето на 13 сеизмолошки станици низ земјава, што претставува сериозен предизвик за националната безбедност и следењето на земјотресната активност.
Овие станици моментално функционираат како дел од меѓународниот проект AdriaArray, кој започна во 2023 година, а се очекува да заврши на почетокот на 2026. Проектот се реализира во соработка со организацијата ORFEUS (Observatories and Research Facilities for European Seismology), која има за цел унапредување на сеизмолошките истражувања во Европа и Медитеранот.
Преку иницијативата AdriaArray, на територијата на Македонија беа поставени 13 привремени сеизмолошки станици што овозможуваат постојано следење на сеизмичките движења, не само во државата, туку и во околните гранични области и глобално.
