Фото: Принтскрин
Австриските истражни органи открија сериозен скандал во рамките на една муслиманска верска заедница со седиште во Виена. Според информациите објавени од австрискиот портал „Heute“, истрагата открила дека верски службеници и вработени во организацијата ја злоупотребувале довербата на верниците и средствата од донациите, користејќи ги за приватни задоволства – вклучително и ангажирање ескорт девојки и организирање оргии.
Парите, кои главно потекнувале од петочни и празнични донации, како и од приходи од продажба на верска литература и услуги поврзани со погреби, биле внесувани во финансиската евиденција под лажни ставки. Како што наведуваат австриските медиуми, износите биле прикажувани како трошоци за рента, плати за имами и административни дозволи, со цел да се сокрие вистинската намена на парите.
Дополнително, истрагата открила и обиди за поткуп на инспектори кои дошле на терен за да го испитаат финансиското работење на организацијата. На службениците им биле понудени патувања и разни забавни активности, со цел да се избегне понатамошно разгледување на сомнителните финансиски трансакции.
По обелоденувањето на аферата, веднаш биле отстранети од функција две лица, меѓу кои и религиски советник кој истовремено бил и водечки член на исламската организација ATIB 63 во Австрија. Името на ова здружение се поврзува со поранешен функционер на турската владејачка партија АКП.
