Фото: Принтскрин
Македонскиот првак Шкендија приреди ново големо изненадување во европските квалификации, откако славеше и на реваншот против романскиот ФЦСБ во Букурешт со резултат 2-1. Со оваа победа, тетовци изборија пласман во третото квалификациско коло од Лигата на шампионите, со што обезбедија и сигурно европско учество во есенската фаза. Нивен следен предизвик ќе биде искусниот тим на Карабах од Азербејџан, кој во претходната рунда го совлада ирскиот Шелбурн.
ФЦСБ започна енергично и успеа да ја пробие одбраната на Шкендија во 28. минута преку Цисоти, кој донесе водство и надеж за домашната публика. Сепак, реакцијата на македонскиот шампион беше брза – Латифи погоди и со прецизен удар го замолкна стадионот во Букурешт, израмнувајќи на 1-1 и враќајќи ја иницијативата кај својот тим.
Во продолжението, Шкендија играше цврсто и организирано, одолевајќи на обидите на Романците да направат пресврт. Како што одминуваше времето, нервозата кај домаќините растеше, а нивната неефикасност беше казнета во самиот финиш – Крстевски со погодок во 87. минута стави печат на историската победа и обезбеди нова европска страница за „црвено-црните“ од Тетово.
