Таравари побара од министерот за здравство да се извини зашто не користел „Северна“

Крилото на Алијансата за Албанците предводено од Арбен Таравари упати сериозна критика до Министерството за здравство, обвинувајќи го за прекршување на Преспанскиот договор и непочитување на уставните одредби. Реакцијата доаѓа само ден по средбата на Таравари со американската конгресменка со грчко потекло, Никол Малиотакис.

Повод за нивниот остар став беше неодамнешното отворање на новиот здравствен дом во општина Илинден. Во официјалното соопштение на партијата се наведува дека институцијата направила два сериозни пропусти: прво, на информативните табли и ознаки не бил употребен албанскиот јазик, и второ, наместо уставното име „Република Северна Македонија“, било наведено само „Република Македонија“.

Од партијата оценуваат дека ваквите чекори претставуваат не само институционално занемарување на правата на Албанците, туку и директно кршење на меѓународно обврзувачкиот Преспански договор, со кој се регулира употребата на уставното име на државата.