Фото: Принтскрин
Со мнозинство од 84 гласови „за“, пратениците на продолжението на 60-та седница го усвоија Законот за издавање вредносни ваучери, со кој секој студент до 29 години ќе добие финансиска поддршка од 250 евра наменета за купување на електронски уред.
Сергеј Попов, пратеник од редовите на ВМРО-ДПМНЕ, од собраниската говорница изрази задоволство што како млад парламентарец е дел од иницијатива која директно ги поддржува студентите.
Дополнително, неговиот колега од истата партија, Јован Јаулески, истакна дека за оваа мерка се издвоени 850 милиони денари од државниот Буџет, со што ќе бидат опфатени околу 55.000 студенти. Тој појасни дека секој студент до 29 години, кој ќе биде запишан во академската 2025/2026 година, ќе има право на ваучер во вредност од 15.300 денари за набавка на лаптоп, таблет или друг електронски уред потребен за студии.
