Фото: ДЗС
Шумочуварите од подружницата на „Национални шуми“ – Осогово, заедно со припадници на Министерството за внатрешни работи, вчера попладне извршија успешна интервенција под Царев Врв, на Осоговските Планини. На надморска височина од околу 2.000 метри, во речиси недостапната месност Алтн Врв, тие открија и отстранија сериозна закана за шумски пожар.
На теренот биле пронајдени повеќе од триесет автомобилски гуми фрлени на куп, како и внатрешни гуми, картон за потпалување, исушени стебла и борови гранки – сè внимателно поставено со очигледна намера за предизвикување пожар на отворен простор.
Директорот на Дирекцијата за заштита и спасување, Стојанче Ангелов, предупреди дека доколку оваа потенцијална катастрофа не била навреме откриена и спречена, пожарот многу брзо ќе се проширел во густата околна шума, предизвикувајќи сериозни еколошки и материјални последици.
