Фото: Принтскрин
Полициски службеници од СВР Тетово спречија трагедија откако успеаја да спасат млада девојка која се обидувала да си го одземе животот, заканувајќи се дека ќе скокне од прозорец на мотел во Тетово.
Инцидентот се случил денеска околу 14:35 часот, кога во полиција пристигнала пријава од лицето Л.К., во која се наведувало дека има недоразбирање со женско лице кое одбива да го напушти мотелот. Полициски службеници веднаш интервенирале на терен, каде забележале жена која стои на работ од прозорецот на една од собите, со сериозна намера да скокне или да се самоповреди со остар предмет што го држела во раката.
По итна наредба од дежурен јавен обвинител, полицијата ја пробила вратата од собата и успеала да ја спречи девојката во нејзината намера. Таа веднаш била префрлена во Клиничката болница во Тетово за укажување медицинска помош.
Во меѓувреме, лицето Л.К. било приведено под сомнение за сторено кривично дело поврзано со посредување во проституција. За време на интервенцијата, еден полициски службеник се здобил со полесни телесни повреди. Случајот е предаден на натамошна истрага.
