Фото: Принтскрин
Основното јавно обвинителство Скопје соопшти дека е поведена кривична постапка против две лица поради насилничко однесување кон градоначалничката на Град Скопје, Данела Арсовска, при нејзина службена посета на локација во изградба во Општина Чаир.
Според наводите од обвинителството, првоосомничениот, кој се претставил како сопственик на спорниот објект, започнал вербален конфликт со градоначалничката, при што ѝ упатил навреди и сериозни закани. Инцидентот ескалирал кога осомничениот физички ја нападнал Арсовска. Во тој момент, реагирале вработени од Град Скопје и припадници на Министерството за внатрешни работи, кои го тргнале напаѓачот од лице место.
„Првоосомничениот вчера се заканувал и физички ја нападнал градоначалничката на Скопје, која заедно со вработени во градските служби, по претходна пријава, излегле да извршат вонреден надзор на нелегален објект во градба на улицата “Севастополска”. Тој се претставил како сопственик на објектот во градба, па почнал грубо да ја навредува, да и се заканува, по што и физички ја нападнал.
Кога изреагирале останатите вработени во градските служби и припадниците на МВР и го тргнале првоосомничениот, со закани продолжило и второосомниченото лице. Со чинот на насилство двајцата осомничени во јавноста и кај другите присутни лица предизвикале чувство на несигурност, загрозување и страв.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за првоосомничениот, пред се поради ризикот да го повтори, односно да го изврши делото со кое се заканувал, но и поради опасноста од бегство.
За вториот осомничен се предложени мерки на претпазливост кои вклучуваат забрана за приближување и воспоставување контакт со градоначалничката и другите оштетени, забрана за напуштање на живеалиштето односно престојувалиштето, одземање на патната исправа и повремено јавување кај определено службено лице во судот“, објави Обвинителството.
