Фото: Принтскрин
Од денес, 1 јули, стапува во сила мерката за целосна забрана за движење во шумите и шумските предели, која ќе важи до 31 август, информира Министерството за земјоделство, шумарство и водостопанство.
Оваа одлука е донесена со цел превенција од пожари во текот на летниот период, кога температурите се високи, а ризикот од појава и ширење на шумски пожари е зголемен. Од Министерството нагласуваат дека сите граѓани се должни да ја почитуваат забраната, без исклучок.
За оние кои ќе бидат затекнати како се движат низ шуми или шумско земјиште за време на важноста на забраната, предвидени се парични казни согласно член 106 од Законот за шумите. Физички лица може да се соочат со глоба во износ од 1.500 до 2.000 евра во денарска противвредност.
„Министерството за земјоделство, шумарство и водостопанство ја известува јавноста дека согласно насоките од Владата како и барањата од корисниците на шумите – ЈП „Национални шуми“ и Националните паркови кои управуваат со заштитените подрачја, даде согласност за воведување на целосна забрана за движење во шумите и шумското земјиште. Согласност се издава согласно членот 57 став 3 од Законот за шумите, поради зголемена опасност и превенирање од појава на шумски пожари на отворен простор. Целосната забрана за движење во шумите започнува од 01.07.2025 година и ќе трае се до 31.08.2025 година. Движењето во шумите ќе биде дозволено единствено со писмено одобрување издадено од страна на подружниците на ЈП „Национални шуми“ и Националните паркови, соодветно за подрачјето со кои управуваат“, соопшти МЗШВ.
При посетата на НП „Шар Планина“, потсетуваат и на обврската за наплата на влез на моторни возила. Тоа може да се направи на интернет страницата https://services.sarmountain.org.mk/ или со СМС порака со категорија на возилото и број на регистрација на 144 – 555. Пример за СМС порака: A TE5678ET (за автомобил) Сопствениците на приватни имоти и правните лица регистрирани на територијата на паркот, се ослободени од надоместок за движење во своите зони.
