Фото: Принтскрин
Семејството Ислам од Кавасо дел Томба доживеа незамислива трагедија, откако нивната деветгодишна ќерка Адна го загуби животот во водите на реката Пјаве. Несреќата се случила вчера попладне, околу 16 часот, во местото Сан Џакомо ди Педероба, недалеку од градот Тревизо, пренесуваат италијанските медиуми, меѓу кои и „Ла Трибуна ди Тревизо“.
Според досегашните информации, Адна Ислам, девојче со македонско потекло, уживала во семеен излет покрај реката, заедно со нејзините родители, Ихмет и Наила, како и со нејзините помали брат и сестра. Додека си играла на камењата со други деца, девојчето се лизнало и паднало во реката, по што било веднаш однесено од силната водна струја.
На местото на несреќата веднаш пристигнале екипи на итната служба, пожарникари, карабинери и нуркачи. По повеќе од два часа интензивна потрага, околу 18:30 часот, телото на малата Адна било пронајдено заглавено меѓу камења во реката.
