Фото: Принтскрин
Министерството за внатрешни работи ги информира граѓаните дека, по насоки од Владата и на иницијатива на Јавното претпријатие „Национални шуми“ и управите на националните паркови, беше донесена одлука за целосна забрана на движење во шумските предели и шумското земјиште низ државата.
Оваа мерка е поддржана од Министерството за земјоделство, шумарство и водостопанство, кое даде официјална согласност согласно член 57, став 3 од Законот за шумите.
Причината за оваа забрана е зголемениот ризик од појава и ширење на шумски пожари, особено во летниот период кога високите температури и сушата го зголемуваат ризикот од огнени стихии на отворено.
„Целосната забрана за движење во шумите започнува од 01.07.2025 година и ќе трае се до 31.08.2025 година. Движењето во шумите ќе биде дозволено единствено со писмено одобрување издадено од страна на подружниците на ЈП „Национални шуми“ и Националните паркови, соодветно за подрачјето со кои управуваат. За непочитување на оваа целосна забрана за движење во шумите и шумското земјиште, на физички лица кои ќе се затекнати да се движат во шума и шумско земјиште, согласно член 106 од Законот за шумите, ќе им се изрече глоба од 1.500 до 2.000 евра во денарска противвредност“, велат од МВР.
