Фото: Принтскрин
Македонската машка ракометна репрезентација до 21 година оствари убедлива победа над селекцијата на САД со резултат 47-28, во натпревар од разигрувањето за пласман на 25. место на Светското првенство кое се одржува во Полска.
„Црвено-жолтите“ стартуваа фуриозно, воспоставувајќи контрола уште од самиот почеток. По само 10 минути игра, резултатот гласеше 10-1 во корист на Македонија, што јасно ја најави доминацијата на теренот. Темпото не опадна ниту во продолжението од првото полувреме, па на одмор се замина со убедлива предност од 24-13.
Во вториот дел, американските ракометари не најдоа начин да се вратат во игра, додека нашите млади надежи продолжија со ефикасна и организирана игра. Разликата постојано се зголемуваше, а до крајот Македонија го заокружи настапот со висока и сигурна победа од 47-28.
