Зеленски спасил жива глава – спречен атентат врз украинскиот претседател

Украинскиот претседател Володимир Зеленски повторно бил мета на неуспешен обид за атентат, а најновиот заговор, според украинските власти, вклучувал полски воен пензионер со долга историја на поврзаност со поранешниот Советски Сојуз.

Директорот на украинската безбедносна служба (СБУ), генерал-потполковник Васил Маљук, на затворен брифинг за домашните медиуми, ги открил деталите за заедничката операција со полската контраразузнавачка служба ABW, со која планот бил навреме откриен и неутрализиран.

Според Маљук, лицето кое било регрутирано од Москва, требало да го реализира атентатот врз Зеленски на аеродромот Жешов-Јашонка во Полска – клучна точка за дипломатските и безбедносни операции во регионот. Планот опфаќал користење дрон со систем за видео-следење од прво лице (FPV) или снајперска пушка, зависно од околностите на теренот.

Иако идентитетот на осомничениот не е официјално објавен, се знае дека тој долго време негувал симпатии кон советската идеологија и останал верен на неа и по падот на СССР. Обидот за атентат, кој првично го објави украинскиот медиум TSN, бил спречен во координирана акција меѓу двете сојузнички служби.