Фото: Принтскрин
Основниот кривичен суд во Скопје на 25 јуни ќе ја донесе конечната пресуда во случајот за бруталното двојно убиство на Вања Ѓорчевска и Панче Жежовски, кое ја потресе јавноста. На денешната главна расправа, обвинетите Љупчо Палевски, Велибор Манев, Боре Видевски и Влатко Кешишев ги изнесоа своите завршни зборови, меѓусебно префрлајќи си вина и изнесувајќи контрадикторни верзии на настаните.
Главниот обвинет, Љупчо Палевски, кој од самиот почеток тврди дека е жртва на политички прогон и негира вмешаност во злосторството, денеска првпат јавно ги посочи своите сообвинети како директни учесници. Според неговите зборови, Велибор Манев бил организаторот на киднапирањата, Боре Видевски извршителот на убиствата, а Влатко Кешишев имал улога на чувар за време на злосторствата. Тој ја обвини Обвинителката служба дека работи под политички диктат и дека нема конкретни докази што би го поврзале со извршувањето на делото.
Обвинителството останува на ставот дека се работи за монструозен чин кој бара најстрога казна. Заради тешките околности и начинот на извршување, предлагаат доживотна казна затвор за четворицата обвинети – Палевски, Манев, Видевски и Кешишев. За петтиот обвинет, Александар Ѓорчевски, таткото на Вања, кој е обвинет за соучесништво, се предлага соодветна затворска казна.
