Фото: Принтскрин
На само петнаесетина километри од Ниш, и приближно 240 километри од Скопје, се крие вистинско природно богатство кое сè уште не е широко познато меѓу туристите – Бања Видриште. Сместена во селото Миљковац, оваа скромна бања станува сè попопуларна поради своите лековити својства и мирната, природна околина што нуди одмор за телото и душата.
Според локални преданија, оваа бања постои уште од 8 век, што ѝ придава дополнителна историска тежина. Нејзината автентичност доаѓа и од локацијата – се наоѓа на темели од некогашна воденица, што ѝ дава ретро изглед и посебен шарм.
Изворите во Видриште се термални и природно извираат со температура повисока од 30 степени Целзиусови, обезбедувајќи постојан прилив на топла вода. Иако бањата е скромна и без луксузна инфраструктура, токму таа едноставност и недопрена природа ја прават привлечна за посетителите кои бараат автентично и алтернативно лекување.
Местото е познато по своето благотворно влијание врз здравјето – посебно во третманот на болки во ‘рбетот, зглобовите, коските, како и за лица што страдаат од артритис, реума и други воспалителни состојби. Освен физичко олеснување, многумина тврдат дека топлата вода и мирната атмосфера им помогнале и за смирување на нервниот систем, подобрување на циркулацијата, па дури и при кожни заболувања.
