Фото: Принтскрин
Денеска во Основниот кривичен суд во Скопје се одржа драматичниот финиш на судскиот процес за едно од најтешките кривични дела во поновата македонска историја – бруталното двојно убиство на 14-годишната Вања Ѓорчевска од Скопје и 74-годишниот пензионер Панче Жежовски од Велес.
Судењето, кое со месеци ја потресуваше јавноста, денеска влезе во завршна фаза со последните зборови на одбраната и обвинителството, а атмосферата во судницата беше исполнета со силни емоции, напнатост и болка од страна на семејствата на жртвите.
Според обвинението, злосторството било извршено со особена суровост и претходно испланирано, а мотивите, кои уште од почетокот го шокираа општеството, се поврзуваат со корисољубие и целосно занемарување на човечкиот живот.
Обвинителката Жаклина Крстевска во својот едночасовен завршен збор ја обвини четворката Љупчо Палевски – Палчо, Велибор Манев, Боре Видевски и Влатко Кешишев дека „немаат грам совест, човечност или родителско чувство“.
„Сите четворица имаат семејства. Наместо со работа и чест, избрале да ги финансираат становите, свадбите и веселбите на своите најмили со крвнички стекнат плен“, кажа Крстевска.
