Фото: Janko Ilkovski
Туристите од Србија кои патуваат со автобус кон Грција треба да бидат внимателни и да внимаваат на џепароши, бидејќи многу лесно може да станат нивна мета, пишуваат српските медиуми.
Токму тоа неодамна му се случи и на еден брачен пар од Србија, на кои крадците, уште на самиот почеток од патувањето, им украле 1.000 евра.
„Сакам само да ги предупредам сите што патуваат со автобус за Грција. Вчера ја ограбија мојата пријателка, односно нејзиниот сопруг, додека се качуваше во автобус. Му украдоа 1.000 евра и сите документи, за среќа пасошите биле кај неа. Тоа се случи во Нови Сад. Носел машка торбица, некој се доближил до него и го ограбил. Ова често се случува, па внимавајте да не ви се расипе одморот“, напишала една жена во Вајбер групата „Грчка инфо“.
На тој портал предупредуваат дека слични ситуации, за жал, се случуваат секое лето во Србија и советуваат зголемено внимание. Летувањето во Грција за многумина почнува уште од автобуските терминали во Белград и Нови Сад, наведуваат на порталот „Грчка инфо“.
