„Марш на ангелите“ и денеска во Кочани: Семејствата не се откажуваат од борбата за правда

Денес, со почеток во 16:05 часот, во Кочани повторно ќе се одржи нов „Марш за ангелите“, протестен собир посветен на жртвите од трагедијата во дискотеката „Пулс“.

Маршот ќе започне во Паркот на револуцијата, а колоната од граѓани, роднини и пријатели на настраданите ќе се движи по однапред определена траса – преку трговскиот центар, покрај зградата на Општината и Полициската станица, со завршна точка пред Судот и Јавното обвинителство.

Целта на маршот е јасна: да се потсети јавноста и институциите на одговорноста што сè уште се очекува за страшниот пожар во кој животот го загубија 62 млади луѓе, а речиси 200 беа повредени. Голем дел од преживеаните и ден-денес живеат со последици – физички и психолошки – од таа кобна вечер. Семејствата на загинатите не се откажуваат од својата борба за вистината и правдата.